O Xulgado do Contencioso-Administrativo nº 2 de Santiago de Compostela deu a razón ao Colexio Oficial de Enxeñeiros Técnicos Agrícolas de Ourense en relación co recurso interposto conxuntamente cos demais colexios de Galicia contra a Xunta por unha convocatoria de prazas públicas.
A Xunta publicara unha oferta de emprego (OPE) para prazas de «enxeñeiro/a técnico/a agrícola», pero limitaba o acceso só á especialidade de Explotacións Agropecuarias. Ademais, permitíase que persoas con titulación de Veterinaria puideran acceder a esas prazas, o que o Colexio considerou totalmente inxusto.
O Colexio recurriu esta decisión que excluía ilegalmente a moitas persoas colexiadas con outras especialidades agrícolas, mentres se lle abría a porta a titulados doutra rama, como os veterinarios. A sentenza foi clara: non se pode limitar o acceso ás prazas ás persoas dunha soa especialidade, nin admitir perfís alleos á titulación esixida por lei.
A Xustiza deu a razón ao Colexio e declarou nulo ese punto da convocatoria, obrigando á Xunta a corrixila.
Esta sentenza marca un precedente clave na defensa da profesión, blindando o acceso ás prazas públicas para quen verdadeiramente ten a formación específica, e impedindo que outros colectivos se apropien de funcións alleas. Un triunfo legal e profesional para o colectivo dos Enxeñeiros Agrícolas.
