Os presidentes dos colexios profesionais de Enxeñeiros Técnicos Agrícolas da Coruña e Pontevedra, Lugo e Ourense mantiveron onte en Santiago de Compostela unha reunión de traballo co propósito de abrir novas vías de colaboración e reforzar a defensa conxunta da profesión en Galicia.

No encontro participaron José María Vidal Fernández, presidente do Colexio da Coruña e Pontevedra; José Antonio López Sierra, presidente do Colexio de Lugo, e José Paz Paz, presidente do Colexio Oficial de Enxeñeiros Técnicos e Graduados Agrícolas de Ourense.

A reunión permitiu compartir a realidade dos tres colexios, analizar os desafíos comúns aos que se enfronta o colectivo e estudar fórmulas que permitan aproveitar capacidades, coordinar iniciativas e xerar novas sinerxías. O obxectivo é avanzar cara a unha colaboración estable que contribúa a fortalecer a presenza e o recoñecemento da enxeñaría agrícola no conxunto de Galicia.

Nun momento no que o sector agrario afronta importantes transformacións —desde a dixitalización e a modernización das explotacións ata a adaptación ambiental, a ordenación do territorio ou a incorporación de novas esixencias técnicas e normativas—, resulta fundamental visibilizar o papel dos profesionais que acompañan estes procesos desde o coñecemento, a experiencia e a proximidade ao territorio.

A enxeñaría agrícola ten unha intervención decisiva na planificación e xestión das explotacións, nas industrias agroalimentarias, na valorización dos recursos rurais, na prevención de riscos, na innovación e na procura de solucións que permitan mellorar a competitividade e a sustentabilidade do sector. Poñer en valor este labor e dar a coñecer a súa verdadeira dimensión constitúe unha responsabilidade compartida polos colexios profesionais.

Desde o Colexio de Ourense estanse impulsando distintas medidas destinadas a dinamizar o colectivo, ampliar a formación e os servizos ofrecidos aos colexiados, favorecer o intercambio de coñecementos e achegar a profesión tanto á sociedade como ás institucións. Este traballo parte dunha convicción clara: avanzar desde cada territorio é necesario, pero compartir criterios e sumar capacidades permite chegar máis lonxe.

Por iso, o encontro celebrado en Santiago representa un primeiro paso para definir liñas de actuación coordinadas, intercambiar experiencias e identificar proxectos de interese común. A vontade dos tres presidentes é manter esta cooperación e convertela nun instrumento útil, capaz de ofrecer respostas ás necesidades actuais dos profesionais e de reforzar a súa representación.

A reunión deixa así unha mensaxe clara: a profesión gaña visibilidade cando os colexios suman voz, coñecemento e iniciativa. Galicia conta cunha enxeñaría agrícola preparada para responder aos retos presentes e futuros do medio rural; o seguinte paso é traballar xuntos para que a sociedade coñeza e recoñeza todo o que representa.