O presidente do Colexio, Pepe Paz, xunto co vicepresidente Manuel Rojo e o secretario Miguel Ángel Viso, mantiveron unha reunión institucional co presidente da Deputación de Ourense, Luis Menor, co obxectivo de presentar oficialmente á nova presidencia e consolidar canles de colaboración entre ambas entidades.

A xuntanza enmarcouse nun contexto de fortalecemento das relacións institucionais e de impulso a accións conxuntas orientadas ao desenvolvemento sostible do territorio ourensán. Durante o encontro analizáronse diferentes ámbitos de actuación vinculados ás competencias do eido agrícola e ambiental, facendo especial fincapé na prevención e xestión de incendios forestais, na planificación e mellora dos recursos hídricos, así como no apoio ao sector agrario e gandeiro como piares fundamentais da economía rural.

Así mesmo, abordáronse iniciativas relacionadas coa  sustentabilidade, como a promoción da compostaxe e outras prácticas orientadas á correcta xestión de residuos orgánicos, contribuíndo á mellora ambiental e á eficiencia no uso dos recursos.

Pola súa banda, o Colexio destacou o valor engadido que achegan os profesionais do sector a través do seu coñecemento técnico e da súa experiencia no territorio, ofrecendo a súa colaboración para o deseño e desenvolvemento de proxectos que dean resposta ás necesidades reais do rural. Neste sentido, trasladouse á Deputación a plena disposición da entidade para participar activamente en iniciativas que favorezan a dinamización do rural.

A reunión permitiu, ademais, identificar posibles liñas de traballo conxuntas e establecer as bases para futuras colaboracións, coincidindo ambas partes na importancia de xerar sinerxías entre territorio e profesionais como vía para dar resposta aos desafíos actuais e futuros da provincia de Ourense.